20120213

拿手菜

紅燒獅子頭

咖哩海鮮茄子煲

牛油煎蘿蔔會素肉鬆

紅燒羊腿

腰果蜜糖蝦

西芹芝麻蝦 

洋葱雞肉丸子 

蝦膠煎雞卷

醋香排骨

蜜汁叉燒

71 則留言:

  1. 可唔可以要兩個菜單:西芹芝麻蝦同蜜汁叉燒?
    淨係得個睇字,唔夠喉^-^,先多謝!

    回覆刪除
    回覆
    1. 菜單?是否指 recipes?我煮餸從來都是隨手煮,沒有 recipes 的。叉燒更談不上 recipe,只是用李錦記叉燒醬焗出來的,但有竅妙:肉一定要選帶有兩分肥的,洗淨後要索乾水,然後用鹽醃兩小時,再落叉燒醬醃四小時;用 400度火焗,期間要反轉,最後十多分鐘搽蜜糖。焗出來有七八成似真叉燒。

      刪除
    2. 你自己都證明啦﹖你查實係唔識整叉燒gala!(爆)
      真係好過份﹐你知唔知係博客入面訛稱自己識得整叉燒﹐係虛假陳述來㗎﹖
      你小心比人話你扮識整叉燒呃綠卡呀(閃)

      刪除
    3. 邊個話要叉住嚟燒先算叉燒?如果我唔講,包你食唔出係焗出嚟嘅。

      刪除
    4. 呢個真係一個重大哲學課題!

      根據意義分析的原則﹐我們首先是能夠把字句的字面意義 (literal meaning) 以及其涵含意義 (implicature) 分辨清楚。
      是故﹐叉燒一詞﹐不論從字面意義及其涵含意義﹐都有其將舊豬肉叉住嚟燒之意。
      當然﹐有人或許質疑﹐日本叉燒便不是叉住來燒的﹐以作反例
      問題是﹐日本叉燒根本便是他們偷師失敗東施效顰半桶水之作﹐純屬意外﹐這亦解釋日本的叉燒拉麵何解唔好食(覺得好食者﹐建議你食白灼瘦肉得啦~~)

      至於「食唔出」﹐同果舊係唔係叉燒﹐係兩回事亦無關係。
      正如大陸用豬肉乃至唔知乜肉﹐加羊肉精來呃食客一樣(見新聞)﹕
      http://www.chinanews.com/jk/kong/news/2008/11-18/1453604.shtml

      我再退一步﹐即使食唔出舊豬肉唔係叉燒﹐但你個寫包單話人地食唔出﹐又係不切實際。
      因為你都講咗囉﹐仲邊有可能「如果我唔講」先﹖

      結論﹕
      (1)哲人王講大話﹐唔識整叉燒
      (2)哲人王整果舊唔係叉燒﹐佢果句「蜜汁叉燒」屬失實陳述。果舊根本係叉燒醬焗豬肉
      (3)哲人王馬後炮﹐話人肯定會誤會果舊係叉燒

      嘩﹐好大單學術醜聞啊!!!我要話比方舟子知(爆)

      刪除
    5. 涵含?你講粗口呀?

      刪除
    6. 王sir,新哲人文少認為係應該叫叉燒醬焗豬肉我覺得非常好,因為我上次去唐人街剛剛買咗一樽李錦記叉燒醬,唔知點用,所以打搞你(唔係粗口)。不過,你講嘅400度,係唔係華氏?因為我哋用攝氏,要搞清楚。
      至於芝麻蝦,因為d細路鍾意食蝦,我成日淨係識整椒鹽蝦,想試試,所以請教橋。

      刪除
    7. 西芹芝麻蝦也易做:蝦洗淨瀝乾,用少許豉油和糖醃半小時,西芹洗淨切段;蝦醃好後將多餘水份瀝乾,加粟粉(不要太多,足夠黏住芝麻便可),拌勻,再加芝麻,落鑊用猛火煎至兩邊都金黃,倒出備用;用蒜頭爆香鑊,落西芹炒約一分鐘,然後落芝麻蝦共炒約一分鐘,打個薄獻(最好用雞湯加粟粉和鹽糖),上碟後加幾滴麻油,增添芝麻香。

      刪除
    8. Thanks, copied and pasted.

      刪除
    9. //涵含?你講粗口呀?//
      你講說話小心D啊﹐涵含意義唔係我講㗎﹐而係港大哲學系個Joe Lau教授﹐佢整果個哲學網站﹐入面咁寫我照搬咋...

      http://philosophy.hku.hk/think/chi/meaning.php

      刪除
    10. 當年也有聽聞過用叉燒醬焗叉燒的作法.
      只是那城市可是有燒臘店的.
      所以那件事就給我帶來作為該市經濟不景的理據.

      刪除
    11. 自己焗的確便宜很多。

      刪除
    12. 文少,

      //你講說話小心D啊﹐涵含意義唔係我講㗎﹐而係港大哲學系個Joe Lau教授﹐佢整果個哲學網站﹐入面咁寫我照搬咋...//

      - 「含意」就夠啦!唔通 Joe Lau 受呢位主播啟發?涵含

      刪除
  2. 想與各大門派擺和頭酒?

    回覆刪除
    回覆
    1. 你同沈沛雲李陶耶有仇啫(嘩,樹敵眾多),同我冇仇喎。

      刪除
    2. 我係話請埋你同我坐陣呀!

      刪除
  3. 蜜汁叉燒是否需要用焗爐烤焗﹖

    請W Wong擲下食譜,給大家參考。

    回覆刪除
  4. 回覆
    1. 「水」字後面那四點很傳神。

      刪除
  5. 好奸啊=口="...
    煮徂出黎釣我地胃口
    跟住自己一個食哂渠.....

    回覆刪除
  6. 好離譜﹐真係好離譜
    堂堂一個哲學教授﹐走去食叉燒就話呀﹖
    竟然走去燒叉燒﹐仲要貼出來炫耀一番
    再次證明咗我地個教育系統出問題﹐社會資源嚴重錯置(閃)

    回覆刪除
    回覆
    1. 要揸兩個幾鐘頭車先買到叉燒,唔係我都唔使自己整啦!

      刪除
    2. 嘩,你住嘅係乜鬼town仔,無理由要揸兩個幾鐘車先買到叉燒

      刪除
    3. 呀,原來一個半小時到另一城市也可買到。話明小鎮,梗係隔涉啲咖啦;兩個半小時車程在美國不算遠了。

      刪除
    4. 無錯
      老師所言不假
      美國市鎮規劃有不妥
      係要將同種類建築起埋一齊
      須常用車 不環保

      刪除
  7. 回樓上:由此可證明 Wong 教授不是不食人間煙火的象牙塔學者。

    回覆刪除
    回覆
    1. 點證明﹖咩邏輯來的﹖

      首先﹐話學者不食人間煙火本身就好好笑﹐從表面字面意思(literal approach)推論﹐只要你係一頭智人而唔係鬼﹐你就一定不食人間煙火﹐最多只係會食煙

      其次﹐王sir話自己識整叉燒﹐只係佢一面之辭。
      單憑一幅相而無其他證據的情況下﹐我地查實係無辦法肯定王sir識整叉燒。
      我地絕對唔能夠排除「碟叉燒查實係佢老婆整」呢個可能性。

      其三﹐即使我地假設王sir真係識整叉燒﹐但都唔能夠因此而推論﹐話佢會食叉燒
      正如我阿媽識蒸雞亦成日整蒸雞﹐但從來唔食雞﹐食長齋。

      好﹐我再退一步﹐同情地理解「不食人間煙火」的寓意﹐乃指一個人不諳世事。
      又再假設王sir不但識整叉燒﹐而且會食碟叉燒
      咁都無辦法證明王sir唔係一個「不食人間煙火」的象牙塔學者。

      結論﹐你呢個推論係亂嚟!(爆)

      刪除
    2. 好彩無煮到肉糜!

      刪除
  8. 有得睇,冇得食,遺憾!

    (近日不時留意韓寒新聞,不禁聯想地懷疑到啲叉燒獅子頭有冇老婆同仔仔響背後“代筆”?)

    cyc

    回覆刪除
    回覆
    1. 從懷疑論睼
      假設感覺合理-0-
      點都好....
      美食當前
      渠有得食
      我得個睼
      係事實.........
      唔制啊T口T 我要食>口<"

      刪除
    2. 我個老婆同仔淨識食咖咋!

      刪除
    3. 一於玩標題黨﹕美國教授陷「代烹門」醜聞

      【本報訊】近日﹐馳名省港澳的留美教授哲人王﹐聲稱曾親手烹調叉燒﹐被網友質疑有人造假﹐幕後有人代煮。

      為了印證哲人王能否製作叉燒﹐本報特別訪問社會大學調理農務系歪理學家陳凱文。

      陳凱文質疑哲人王懂得製作叉燒的可能性﹔並且表示﹐單靠一幅照片﹐更證明不了哲人王懂得烹調叉燒﹐也不能排除這碟叉燒有人幕後代煮﹐甚至在唐人街街邊買的可能性。

      以下﹐是本報記者與陳凱文的訪問內容﹕

      記﹕你認為哲人王識得煮叉燒嘛﹖

      陳﹕絕對無可能﹐煮叉燒是一門專門技能﹐一個正常人根本無可能懂得煮叉燒。你若要移民外國的話﹐識得煮叉燒是會加分的。

      記﹕你憑乜認為哲人王唔識得煮叉燒嘛﹖

      陳﹕表明證供以及哲人王背景﹐從而得出合理懷疑。
      第一﹐一個正常人﹐如沒跟過師傅學師﹐是沒可能識得整叉燒的﹐尤其是廣東叉燒。
      第二﹐一個正常人即使識得整廣東叉燒﹐整叉燒係要有個特製燒烤爐的﹐個爐仲可以燒乳豬同燒鵝﹐哲人王根本無可能有烹調器具去整叉燒。
      第三﹐即使你有果個特製燒烤爐﹐但哲人王係一個大學教授。
      Mr. Derek Lam在《象牙塔的原罪》這篇偉大著作中﹐便已明確指出﹕「若張三是任何學科的碩士或以上,則張三必然是自閉在『象牙塔』中、絲毫不通世務」
      因此﹐我們以此推論一個在美國任教哲學的教授﹐必然是自閉在『象牙塔』中、絲毫不通世務的。在這個假設基礎底下﹐哲人王識得整叉燒﹐是不可思議的﹐完全不合常理!

      記﹕問題係﹐我地無證據顯示﹐哲人王係唔識整叉燒喎﹖

      陳﹕有好多事物﹐係可以用邏輯同間接證據推理出結論﹐或者作出合理懷疑。科學之所以是科學﹐便是有其可證偽性﹐即係英文嘅infalsibility。
      合理懷疑唔係結論﹐當哲人王能夠提供自己識得整叉燒的新證據﹐懷疑自然會被推翻。

      又﹐跟你鋪話法﹐其實我地會有更多疑點。
      例如﹕哲人王究竟係咪男人呢﹖
      你又未親身見過哲人王﹔
      即使你見過哲人王﹐你又未必同佢一齊疴過尿﹔
      即使你同佢一齊疴過尿﹐佢又未必會用企兜疴﹔
      即使佢會用企兜疴﹐但我聽講日本發明咗一舊嘢﹐用來幫女人企係度疴尿﹔
      除非你見過哲人王親身露械﹐否則你根本無證據證明佢係男人
      又﹐即使哲人王係你面前親身露過械﹐但你亦都唔能夠排除佢係生物學上嘅雙性人(intersexuality)。

      好﹐我即使比你證明到哲人王係個男人﹐但你又憑乜證明呢個博所有文係哲人王寫呢﹖一個哲學教授﹐係自己個博竟然連文都唔寫﹐而係是是但但貼幾幅相﹐炫耀一下自己識煮咩撚手小菜...你唔覺得好唔合常理咩﹖
      你話個博客﹐係出自師奶手筆﹐貼下相講煮乜菜比老公仔食...就無問題呀﹖
      家陣係男人老狗﹐走入廚房煮餸喎﹖煮餸都算啦﹐仲要識整叉燒﹐你唔好話你識得煮滿漢全席九大簋﹖
      真係完全唔合邏輯!

      記﹕咁最有可能﹐碟叉燒係邊個整呢﹖
      陳﹕最有可能係燒味師傅﹐哲人王不過係街邊買
      如果唔係﹐最大可能性﹐係佢老婆
      其次﹐係佢個仔
      總之﹐最無可能﹐係哲人王。

      記﹕點解你寧願認為碟叉燒係佢個仔整﹐都唔信哲人王呢﹖
      陳﹕首先﹐因為佢個仔未成年﹐唔係男人老狗﹐男人老狗多數唔識煮飯食﹐即使識整都唔願整﹐而係返到屋企翹埋雙腳等食
      其次﹐佢個仔係美國大﹐思想有機會半唐番﹐未必會咁大男人﹐覺得煮飯湊仔係女人做
      其三﹐哲人王點睇都唔似識得整叉燒。

      記﹕哲人王話打算告你誹謗﹐你點睇﹖
      陳﹕痴線﹐佢又唔係韓寒﹐況且佢係美國﹐點告我呀﹖(閃)

      刪除
    4. 好,我懸賞三億美元,邊個證明到相中叉燒唔係我整嘅,可領賞金!

      (順便一提,係 falsifiability,唔係 infalsibility。)

      刪除
    5. 根據未可知論原則﹐我無辦法證明神存在﹐又無辦法證明神唔存在﹐所以我既唔能否定也不能肯定神存在的可能性
      是故﹐由於無片睇只係得相﹐所以我既唔能否定也不能肯定碟叉燒係你煮的可能性
      不過表面證供﹐以及你所聲稱嘅學歷同背景﹐均證明D餸係由你親身煮﹐有些少唔合常理。
      同埋你已經親身證實﹐你果碟唔係真正廣東叉燒(爆)

      刪除
    6. 邊個話學歷同鑊歷有矛盾嘅?煮餸係好容易嘅事,我用左手姆指、食指、同中指三隻手指就可以煮得唔錯,一邊煮一邊睇哲學書都得。

      刪除
    7. 三億美金?首先,根據這裡以前網誌的文章,可以合理懷疑作者未必有咁多錢。
      二是文少列出的疑點,都是基於公開的材料和常識的合理質疑。王sir大可逐點回應,一一加以反駁。現在一反往常淡定,反而拿錢來砸人,明顯已感到王sir已經心虛和氣急敗壞,幾乎可以肯定其背後存在代煮團隊!

      cyc

      刪除
    8. 死嘞,我識得人少,搵唔到個靚女明星力挺我兼加重懸賞添!

      刪除
  9. 情人餐?現任前度前前度...相見歡?

    回覆刪除
    回覆
    1. (認真) 你做的不太像家常菜,很有酒家菜的影子

      刪除
    2. 同意Joseph,尤其是那碟洋葱雞肉丸子和蝦膠煎雞卷!似乎手工蠻多的。

      刪除
    3. Present 得好看一些而已。紅燒獅子頭和蝦膠煎雞卷最多工夫,其他的都頗簡單。

      刪除
  10. 有無整番個陳皮雲耳菜根煲先?

    回覆刪除
    回覆
    1. 飲咗係咪會好勇武、仲會成為個真男人先?

      刪除
    2. 又或者會飲到甩頭髮?

      刪除
    3. //陳皮雲耳菜根煲// 飲咗變陳雲的耳根 --zpdrmn

      刪除
  11. 仲唔去改過張CV?他日大學抄咗你,仲可以:
    1) 去圖章街刻圖章;
    2) 去武館敎拳或敎舞獅;
    3) 去報館做寫稿佬專撩事鬥非;
    4) 去九流樂隊彈琴伴奏;
    5) 去做家務助理執得間屋一塵不染;
    6) 去整叉燒及斬叉燒(呢個最爆)

    唔使怕失業!

    回覆刪除
    回覆
    1. 7)去賣藝表演紙牌魔術

      刪除
    2. 8)去糖水舖煮番薯糖水;
      9)去茂記餅店整中秋豬籠餅;
      10)去寫武俠小說......

      刪除
    3. 1) 篆刻唔同刻圖章。
      4) 我啲琴技連去九流樂隊伴奏都未得。
      9) 中秋豬籠餅係我老婆整嘅,我唔識整。

      我做健身咁耐,好有力咖,可以:

      11) 做苦力搬搬抬抬。

      刪除
  12. 我出一千億美元比證明到阿王有三億身家的人

    回覆刪除
    回覆
    1. 如果你證明到自己有一千億美元,我即刻想辦法借三億返嚟,證明我有,然後領你一千億美元賞金,仲有賺九百九十七億喎!

      刪除
  13. 王sir,你得囉,貼幾幅相都咁多留言!

    回覆刪除
  14. 有話 "A picture is worth a thousand words" 王Sir的十幅佳餚pictures相信就係等於ten thousand words喇。

    回覆刪除
  15. Wong,
    //邊個話要叉住嚟燒先算叉燒?// 我話! Yours was 焗叉燒. No, it's 焗燒. No, it's 焗焗.
    //如果我唔講,包你食唔出係焗出嚟嘅。// I surely can tell the difference. I can tell if it's from old style charcoal oven. Want to bet? --zpdrmn

    回覆刪除
    回覆
    1. You would be surprised how close mine is to the real thing.

      刪除
    2. Oh yeah. I will find you one day and ask for your 焗叉燒.
      打獻=勾芡吧 --zpdrmn

      刪除
    3. Yes, "打獻" is Cantonese.

      刪除
  16. Wong Sir, 請指教蝦膠煎雞卷的作法。
    shiren

    回覆刪除
    回覆
    1. 這道菜很多工夫。選兩塊較大的雞胸肉,一塊雞胸橫切出兩薄片(剩下的雞肉待用),用鬆肉鎚鎚打成更薄,然後用適量的鹽、少量的糖和黑椒醃半小時。用十至十二隻中蝦連剩下的雞肉剁成蝦膠(用攪拌機亦可),剁成後加適量的鹽和一小撮捏碎的油蔥酥(fried shallot)拌勻。將蝦膠鋪在雞胸片上,厚薄與雞胸片相若,然後捲成卷狀,末端塗上粟粉水,以防煎時雞卷會鬆開。雞卷上灑一層薄薄的粟粉,落油燒紅鑊,轉細火,雞卷落鑊慢火煎成金黃色(稍焦亦可),煎時要轉動雞卷,令全條雞卷也煎到。煎成後取出切成塊狀上碟(可加西蘭花伴碟)。

      刪除
    2. 謝謝分享。我用鴨油煮白蘿葡惹味,牛油也有相似效果,但材料更方便,一定會效法。

      刪除
    3. 蘿蔔跟牛油相配會有一股特殊的香味。

      刪除
    4. 像牛腩蘿蔔煲嗎?牛腩肥美的話。

      刪除
    5. 香味不同,你試試便知。

      刪除